أزمة لون بشرتي

من أكتر الحاجات إللي وجودها بيثير دهشتي هي الـskin tone للـemojis بتاعة الـmessaging apps زي الـWhatsApp وSlack وZoom وTeams وما شابه..نفسي أفهم الـurge إللي بيبقى عند أحدهم عشان يعلم إللي حواليه عن لون جلده هنا..ده يعني المفروض يهمنا في أيه وإحنا بنتعامل معاك؟ أفهم الناس إللي بتعلم عن دينها لإن الدين مكون أساسي للإطار الأخلاقي إللي بيحكم أحدهم..أو الناس إللي بتعلم عن بلدها..لإن دي برضه المكون الثقافي لفكرنا..فدي أمور بتعرف هويتي كإنسان فأتفهم منطق إللي بيعلنوا عنها..لكن لون الجلد ده يعني حيعرفني عنك أيه؟ إنك قمحاوي؟ أهلًا وسهلًا..أنا كده استفدت أيه؟ ليه البعض بيعتبر لون البشرة جزء من الهوية أصلًا؟

الهوس عند البشر بموضوع لون البشرة ده من قديم الأزل..لطالما سالت نفسي: إشمعنى لون البشرة إللي مهم أوي كده؟ ليه مش لون العين مثلًا ولا لون الشعر؟ ليه مش يكونش لون الكلية طيب؟ 😁 على قولة جيفري دامر في المسلسل لما كان بيكلم صاحبه الإسود: يا ترى لو شقناك وشوفنا أعضائك الداخلية..حيبقى لونها غامق برضه؟ شوف يا أخي الهوس بالموضوع واصل لفين؟ هوس كله داير على لون البشرة دونًا عن كل الـphysical characteristics التانية للجسد.

وكم أهدرنا من طاقة في موضوع الأعراق ده وإللي المعرّف الأساسي له هو لون البشرة بطبيعة الحال..فرع معرفي كامل مالوش أي معنى في الحياة..أفهم إن الأعراق يتم دراستها لأغراض طبية بحتة..لكن ليه تكون جزء من الـanthropology؟ وهل فيه حد النهاردة من السذاجة بمكان إنه يصدق إن عرقه خالص؟ ما كلنا مخلطين..فالإخوة إللي عمالين يتخانقوا إن عرقي أمازيجي ولا مصري مش عربي..أيوة إنت عرفت إزاي برضه؟ هل عشان إنت اتولدت في البلد دي بقى ده عرقك ولا دول أجدادك البيولوجيين؟ ولو حتى سلمنا بكلامك..فده برضه معناه أيه؟ أنا مثلًا طلعت سليلة العرق المصري القديم..ده لو فيه حاجة اسمها كده أصلًا..فده يقول عني أنا أيه؟ ما انا حد تافه أهو وحبقى عرة المصريين القدماء وحيتبروا مني في مقابرهم. 😂

مش معقول وصلنا للقرن الواحد والعشرين ولسة فيه ناس معتقدة إن لون جلدها بيعرف عن هويتها ويتم الإعلان عن ده في بيئات العمل كده عادي من خلال الـmessaging apps..ولا الـjob applications إللي بتبقى الشركات والمؤسسات الأجنبية بتسأل فيها عن العرق وتحط قايمة طويلة تختار منها..أقسم بالله ولا أعرف تصنيفي كعرق أيه ولا مهتمة أعرف أصلًا عشان أعلمكم بها وانا بملا الـapplication وأصلًا أرفض إني أدي المعلومة دي من أساسه..لون جلدي لا يعرف أي شيء عني عشان تسأل عنه.

الفكرة دي بائدة وأتمنى إنها تختفي من على الكوكب..فالـskin tone في الـmessaging apps ممكن يكون لون غير بشري خالص زي الأخضر أو الأزرق عشان نقفل الباب ده خالص..ما ينفعش أي job hiring application تكون لسة بتسأل السؤال ده ولا حتى لو سؤال اختياري ولا حتى بحسن نية إننا نقيس كشركة الـdiversity عندنا لإن طالما we are addressing the subject, then it is still a concern ولون البشرة ما ينفعش يكون محط نقاش من أصله في عصرنا الحالي..محتاجين ثورة على الـconcept ده لإنهائه للإبد.