الأزمة الفلسطينية، أم أزمة الوعي العربي؟

 

ديباجة: في تناولي القادم حخلي مرحلة ما قبل التاريخ على جنب..نظرًا لإنها مش مهمة أوي بالنسبة الموضوع المُتناول..جدير بالذكر إن مرحلة ما قبل التاريخ دي هى إللي سبقت اختراع الكتابة في سومر في العراق، وإللي حصل ما بين 3400 – 3200 قبل الميلاد.

 

على أرض فلسطين، القصة بتبدأ في التاريخ المُسجل بشعب العموريون، أو زي ما بعض الناس شايفين إن الأصح إن اسمهم الأموريون، ودول شعب سامي قديم جدًا يُقال إنه سكن الأرض دي في حدود 4000 سنة قبل الميلاد وكانت فلسطين في الوقت ده اسمها موريا..دخل عليهم بعد كده الكنعانيون ودول برضه شعب سامي قديم..ما قضوش عليهم ولا حاجة بل عاشوا ما بعض من عام 3300 وفي عهدهم فلسطين كان اسمها أرض كنعان، بالمناسبة الشعبين دول مش عرب، بعد كده دخل عليهم شعب البليستو..أو زي ما كان بيُطلق عليهم شعوب البحر، شعب مش عربي أخر، دول كانوا ناس جاية من جزر في بحر إيجه، يُعتقد إن معظمهم من جزيرة كريت أو الأناضول، المهم دول كانوا جايين جعانين من حالة قفر حصلت عندهم، واستقروا على الأرض دي بدءً من القرن الـ12 قبل الميلاد ومن هنا جه اسم فلسطين (بالمناسبة، عُرفت الأرض دي بفلسطين في الأثار القديمة وفي المخاطبات المصرية القديمة والأشورية، يعني مش صحيح إن الرومان هم أول من أطلق عليها اللفظة دي لما إحتلوها، لأ الموضوع أقدم من كده بحبة حلوين)، وبرضه دول ما قضوش على الأموريين ولا الكنعانيين (الكنعانيين بقى يُطلق عليهم مع الوقت الفينيقيين) ولكن عاشوا مع بعض ودي تُعتبر الشعوب الأصلية للمنطقة دي وكانوا لسة ما استعربوش لحد الوقت ده، من قبل الفتح الإسلامي طبعًا كان بدأ يبقى للعرب وجود محسوس في أرض فلسطين من خلال الهجرات، زيها في ده زي مصر إللي حصل فيها نفس الشيء بالمناسبة عشان النعرة الشوفينية إياها بس الشغالة عندنا في مصر اليومين دول، وجود العرب في مصر سابق كتير للفتح الإسلامي وإللي عايز يعرف أكتر عن الموضوع ده يقرأ رواية النبطي لدكتور يوسف زيدان، المهم نرجع لفلسطين وإللي استعربت بطبيعة الحال مع الفتح الإسلامي على يد الخليفة عمر بن الخطاب في سنة 637 ميلادية ومع الوقت أصبح أهل المنطقة دي عرب زيهم زي باقى المستعربة لإن العربية ما بقتش عرقية من زمان على قد ما بقت بوتقة ثقافية خلت سكان المنطقة من المحيط إلى الخليج يُطلق عليهم العرب..زي ما بنقول الأوربيين كده وهم الناس إللي بتجمعهم بوتقة ثقافية واحدة وإللي مفيهاش عناصر التماسك إللي موجودة في العربية أكيد. المهم، رجوعًا تاني لفلسطين، زي ما إحنا شايفين كده الشعوب الأصلية للمنطقة دي فاضلة على الأرض من 4000 سنة قبل الميلاد لحد يومنا هذا، الـيفطة بس إللي اتغيرت، يعني كانوا الأموريين لوحدهم..جه عليهم الكنعانيين واندمجوا مع بعض، جه عليهم البليستو واندمجوا مع بعض، جه عليهم العرب واندمجوا مع بعض، وفي الأخر بقى شعب عربي من يجي من أكتر من 1400 سنة، اليفطة بتتغير بس هم هم نفس الناس لا راحوا ولا جم، ولعلني أحيل القارئ لمحاضرة للدكتور خزعل الماجدي متقسمة على جزئين قايل فيها تفاصيل مهمة أكتر عن الشعوب إللي سكنت فلسطين لإني هنا قايلة على الشعوب الرئيسية (الجزء الأول، الجزء التاني).

 

دي قصتنا، تعالوا بقى نشوف قصتهم هم وفقًا للي نعرفه، العبرانيون، ودول شعب سامي برضه، دول دخلوا في فلسطين على 3 موجات من الهجرة بدأت من 1800 قبل الميلاد، وأسسوا مملكتهم – إسرائيل الموحدة - وإللي استمرت 100 عام حوالي 1050 قبل الميلاد، بعد كده المملكة دي اتقسمت لمملكتين، إسرائيل الشمالية ودي قعدت بتاع 200 سنة كمان ويهوذا الجنوبية ودي تقريبًا كملت بعد كده 200 سنة كمان، طبعًا لما الممالك دي كانت موجودة - غير إنهم كانوا في صراعات طول الوقت بينهم وبين بعض - لأ ده حصل كمان الأسر الأشوري ومن بعده الأسر البابلي، ده كان فيه أسر بطلمي كمان، لحد ما جه الحكم الروماني وطرد اليهود برة أورشليم خالص ومن وقتها وحصل الشتات بقى في العالم كله (الشيء بالشيء يُذكر، لفظة أورشليم لفظة كنعانية وليست عبرية بالمناسبة)، من النقطة دي بقى ونقدر نعتبرهم شعب مندثر لإن كل مجموعة اختلطت واندمجت وسط الشعوب المضيفة، وما تسمعوش للي يقولك لأ إحنا كنا بنعيش في ghettos وبنحافظ على عرقنا، مفيش الكلام ده والدليل بَيّن يعني مش محتاجة قوة ملاحظة..ده اليهودي الأوربي أشقر والأثيوبي إسود والشرق أسيوي أصفر والشرق أوسطي قمحي وبمناخير كبيرة، يبقى عرق أيه إللي متحافظ عليه؟ ليس بيننا اليوم شعب بني أسرائيل، ده شعب مندثر، واليهودية ما هى إلا ديانة، وده طبيعي، شعب أيه ده إللي عاش مُشتت في بقاع الأرض من يجي من أكتر 2000 سنة وحيفضل محافظ على عرقه؟ طبعًا في تفاصيل مشوقة جدًا في الموضوع ده في كتاب اليهود أنثروبولوجيا للدكتور جمال حمدان وإللي موجود ككتاب مسموع على الـYouTube بالمناسبة بألقاء جيد جدًا (إللي حابب يسمعه يقدر من هنا).

 

طيب، أدي حكايتنا وحكايتهم، فالخلاصة، إحنا على الأرض دي من 6000 سنة وأكتر ما خرجناش، ودول ناس عاشولهم كام مية سنة على الأرض دي وخرجوا وما رجعوش تاني، إللي رجعولنا دول ناس تانية خالص، وحتى لو هم إللي كانوا رجعولنا بمعجزة لوت الزمن ورجعتهم، برضه مالهومش أحقية في الأرض دي، ده إنتوا سايبينها من يجي من 2000سنة وأكتر، على كده بقى أي حد عدى على بلد وعاشله عليها يومين يجي يطالب بحقه في البلد دي، ده كده مثلًا اليونان لها في مصر كتير، البطالمة مش بس حكموا مصر لفترة كبيرة، لأ دول اندمجوا في شعبها وبقى يتقال عليهم المصريين عادي..ما يجوا بقى بالمرة ياخدوا حتة هنا، بس طبعًا العرف الدولي ما يعرفش الكلام ده، المفروض يعني، الأرض للحيازة، والمتحوزين على الأرض دي من ألاف السنين إحنا مش هم.

 

خلينا نرجع شوية لورا ونتكلم عن إللي جولنا دول برضه، لما بدأت الحركة الصهيونية - تحديدًا مع هرتزل في نهاية القرن الـ19 - هم كانوا عايزين بلد لليهود والسلام، وده طبعًا بسبب الاضطهاد إللي لاقوه على يد التيارات المعادية للسامية إللي ظهرت في أوروبا وإللي وصلت لقمة تطرفها مع النازيين، لكن الموضوع أصله قديم وبادئ من قبل النازيين بكتير، بس فلسطين ما كانتش هى أول خيار خالص بالمناسبة، أصل اليهود يعني ما افتكروش إنها أرض المعاد إلا في نهاية القرن الـ19؟ ومال ما حاولوش يرجعوا ولو مرة ليه على طول الـ2000 سنة من وقت ما اطردوا منها؟ لأ هى الخيارات كانت في الأول ما بين موزمبيق والكونغو والأرجنتين وقبرص وسيناء كمان حتى وأخر محاولة كانت أوغندا، فين بقى لما أعلن هرتزل في أمريكا بعد كده إنه عايز فلسطين، ومن وقتها وبدأت الحركة في تهجير اليهود لفلسطين.

 

في الوقت ده كانت فلسطين زيها زي كل دول الوطن العربي تقريبًا، جزء من الإمبراطورية العثمانية، وإللي لما خسرت الحرب العالمية الأولى كجزء من قوى المركز، اتجابت مناخيرها في التراب بمعاهدة سيفر إللي بموجبها اتفرض الانتداب البريطاني على فلسطين ومصر وغيرها وإللي على إثرها إدى بلفور وعده المشهور، وعد من لا يملك لمن لا يستحق، بالمناسبة الوعد ده كان بإن حيبقى لليهود وطن في فلسطين جنب الفلسطينيين ليس إلا، مش كل فلسطين برضه، المهم، حتى وعد بلفور، كانت نسبة اليهود في فلسطين في حدود 3-5%، يعني الحركة الصهيونية ده أقصى حاجة عرفت تحققها بجهودها الذاتية، لكن وعد بلفور بقى إدالهم الضوء الأخضر، هنا بقى تكثفت حركة الهجرة جدًا وظهرت عصابات الهاجاناه، لحد ما أعلنوا قيام دولتهم سنة 1948، سنة النكبة.

 

طيب أنا عايزة أقول من ده كله أيه؟ إن ده استعمار أجنبي صرف، إن القصة دي لازم الكل يعرفها وأول ناس لازم تعرفها هو إحنا، ليه؟ لإن إحنا في مصيبة محدش واخد باله منها، إنت سيادتك لو نزلت الشارع المصري، وده شارع فيه ناس لسة حاسين بالقضية، لإن في شعوب - عربية للأسف - توجههم مع القضية دي أصبح مخزي لدرجة كارثية بكل ما تحمله الكلمة من معنى، دول ما بقوش شايفين للفلسطينيين أي حق، بس خلونا ناخد شعب وسطي كده زي المصريين، لو وقفت 10 في الشارع وسألتهم لو جالك الفلسطينيين والصهاينة تحّكم ما بينهم وإنت إللي كان في إيدك القرار تمامًا، تحكم بأيه؟ شايف العدل هنا يكون إزاي؟ حتلاقي المعظم جاوبك بالتعايش السلمي المشترك أو حل الدولتين، والحقيقة دي مصيبة ما تقلش عن النكبة والنكسة في فجاعتهم، على مدار عقود، حصل للناس غسيل مخ من خلال البروباجندا، أحسنهم حالًا بقى زي المصريين كده، أه لسة شايفين حق للفلسطينيين في الأرض، ولكنهم برضه مش ممانعين في وجود الصهاينة على الأرض، لأ يا خوانا، دي طامة كبرى، لازم نفهم كويس إن الأرض دي ولحد أخر إنش هى حق للعرب، دول مجرد مستعمرين، نعمل معاهم أيه؟ يرجعوا مطرح ما جم ما هي سهلة، الكيان ده في عمر الدول لسة طالع أول إمبارح بليل، يعني كل واحد فيهم عارف كويس أوي هو كان جاي من أنهي بلد، يرجعلها، ما هى بتبقى كده، الجلاء لما بيحصل والمستعمر لما بيخرج بيروح فين؟ بيرجع بلدهم، it just happens إنهم مش جايين من بلد واحدة بس دي ما تفرقش في حاجة في الأخر، فده الحل العادل، طال الزمان أو قصر ده الحل العادل، يمكن ناخد خطوات وسيطة زي حل الدولتين ده فعلًا، لكن يظله مش الحل النهائي أبدًا، ولو ما قدرناش إحنا نوصل لنقطة النهاية العادلة، يوصلها أولادنا، لو ما قدروش يبقى أحفادنا، بس ده عشان يحصل لازم نفضل فاكرين حقنا ونفضل مصرين عليه ونورثه للي بعدنا.