أزمة الجدل في وطننا العربي

الأمم العظيمة تُعرف بقدرة أفرادها على نقاش كل شيء وأي شيء..مفيش concept في الحياة دي مش قابل للنقاش والخضوع للجدل..والفكرة لا تجابه إلا بالفكرة فقط.

للأسف العالم كله تراجع في الموضوع ده..مش معقول مسار الإنسانية كان وصل للسماح لناس زي فرويد ونيتشه وماركس بطرح أفكارهم..وهى أفكار إتضح عوارها الشديد بعدين..ومع ذلك..العالم وقتها سمح لهم بطرح أفكارهم عادي ومحدش فيهم جراله حاجة يعني مع إن وقتها برضه دي كلها كانت أفكار صادمة..لكن النهاردة..ثقافة الـcancellation بقت هى السائدة وناس زي دي مستحيل يظهر مثيل لها تاني..ودي مشكلة..لإن كل الأفكار لازم تُطرح..واحد لإن من حق أي حد يطرح فكرة في دماغه وما يتعرضش لإرهاب فكري..اتنين والأهم من حق باقي الناس تعرف إن فيه ناس غيرها على الكوكب مؤمنين بالفكرة X وحجم الناس دي قد أيه عشان يتم التعامل مع ده..تاني..من خلال طرح وجهة النظر المقابلة..otherwise..الفكرة لو خاطئة حتفضل موجودة عند ناس وقابلة للانتشار من غير ما حد يحس بها ولا يقدم طرح بديل يجابهها.

الأمر ده بقى واخد منحى تاني خالص في منطقتنا العربية..إحنا في حتة وحشة أوي في الموضوع ده أقسم بالله. 😁

أولًا..للأسف ونظرًا لسوء جودة التعليم..فقواعد المنطق السليم وما يتبعه من علم..علم الإحصاء..عن نفسي بعتبره الابن البار لعلم المنطق..معظم الناس ما تعرفش عنهم حاجة..حتى المتعلمين كويس..فبتلاقي ظواهر عجيبة وإنت بتتكلم مع أحدهم في مواضيع عادية..أبرز ظاهرة إنه تلاقيه بيرد على حاجة تانية خالص مالهاش أي علاقة بإللي كنتوا بتناقشوه..طبعًا عند النقطة دي والنقاش مش بيروح في حتة.

ثانيًا..عدم مراعاة أصول النقاش ودي المشكلة الكؤود عندنا..أبسط اصول النقاش إنك ما تشخصنهاش..ما ينفعش تقول لحد مثلًا: كلامك سطحي..ولما يعيب عليك تقوله: أنا بقول على كلامك إللي سطحي مش إنت إللي سطحي..يا سلام..فرقت كده يعني؟ يا جماعة ما ينفعش..تقدر تعبر عن اختلافك مع الرأي المطروح ببساطة بإنك تقول: أختلف معاك..بس كده..لا تبدي رايك في الشخص ولا في رايه أيًا كانت درجة اختلافك معاه..أنا نفسي الناس تتكلم مع بعضها كإنها بتتكلم مع ChatGPT كده..إنت مفترض إن مفيش نية مبيتة معينة عنده ولا خلفية حاكمة لكلامه لإنه ببساطة مجرد programme..تعامل بقى مع الإنسان إللي قصادك بتناقشه بنفس الطريقة..إنت بتكلم شبح أو bot..لا لك دعوة هو نيته هنا أيه ولا خلفياته أيه..لما حنمشي على الأساس ده حنبطل التصرف العجيب إياه ده مثلًا بتاع إننا نخش ندعبس في profiles الناس عشان نفهم خلفياتهم عشان نمسكهم منها وإحنا بناقشهم.

ثالثًا الهشاشة النفسية..تلاقي أحدهم طرح رأي controversial شوية أو أثار ضجة..وتلاقي الناس داخلة تناقشه عادي ما حصلش تجاوز ولا حاجة الحمد لله..على عكس العادة يعني..فتلاقيه هو بقى إللي راح حاذف الـpost على بعضه..أو عامل للي اختلف معاه block..أو الصنف الأسوأ بقى إللي بيرد مع المختلف معاه وهوب تلاقيه راح مديله block بسرعة بحيث إللي قصاده ما يلحقش يرد ويبقى هو إللي باين إنه المنتصر في المناقشة دي على أساس إنه هو إللي رادد الرد المفحم أخر واحد يعني وكده..تصرفات صبيانية ومش مبررة..وليه ده كله؟ ما إنت بتقول راي إنت مؤمن به..مش طبيعي كل الناس حتسقفلك يعني..عادي الناس تختلف معاك..بل عادي إن كله يختلف معاك..ده ما يخلكش تحذف كلامك أو تتجنب معارضيك بالمنظر العجيب ده..حتى لو حصل تجاوز من البعض..وده بيحصل أكتر مع الشخصيات العامة..تجاوز تجاوزه ده وخلاص مش لازم دايمًا تشتبك أصل حتشتبك مع متجاوز؟ ما إنت حتتجاوز زيه..بس كون ده بيحصل ما يدكش الحق كشخصية عامة إنك تقفل التعليقات على كل متابعيك وكإننا في مدرسة..حركة عاملها واحد زي بلال فضل ودكتور يوسف زيدان مثلًا..التصرف المقابل لده والعجيب برضه..إن أحدهم يروح عامل لحد unfollow لمجرد إنه بيطرح أراء هو لا يتفق معاها..مع إنه ما تجاوزش أبدًا أثناء طرحه هذه الأراء..بس هو خلاص ما بقاش مستحمله لمجرد إن تفكيره مختلف.

رابعًا..ليه مفيش فكرة إني أخد خطوة لورا؟ عادي إني أكون بتكلم مع أحدهم..ونقطة من النقاط إللي قلتها اكتشفت خطأها وإحنا مكملين كلام..عادي..نقول ببساطة: بسحب النقطة دي وبنكمل النقاش عادي..لكن لازمته أيه المقاوحة في نقطة إتضح خطأها فعلًا؟ ده مثلًا شكل تاني من أشكال الهشاشة..اصل مش معنى إنك قلت معلومة غلط إنك غير مثقف أو غير مطلع على الموضوع محل النقاش.

وفيه ممارسات تانية كتير وأكثر سوءً للأسف بس مش حيتسع المجال لرصدها كلها..بس بيت القصيد..إحنا فعلًا واصلين لحتة وحشة أوي في الفكر والجدل..ودي أصلها علامة فارقة لمكانتا بين الامم.