أزمة قضايا الرأي العام

مش عارفة إذا كنت أنا إللي خامة قاضية زيادة عن اللزوم بس هو أنا الحقيقة مفهوم العدل دايمًا بياخد من تفكيري حيز كبير وفكرة أيه إللي يعتبر تصرف عادل وأيه إللي ما يعتبرش..يمكن لإني بشوف قيمة العدل هى القيمة التاج فوق باقي القيم وإنها لازم تتحقق الأول قبل ما نتكلم عن تحقيق أي قيمة تانية.

تعارض مفهوم "قضية الرأي العام" مع مبدأ العدالة ده بقى إللي بيستوقفني كتير وخليني أعرض بعض النماذج هنا.

- من يجي أكتر من عقد من الزمن انطلقت حركة Black Lives Matter في أمريكا وإللي وقتها العالم كله تفاعل معاها..إللي حصل إن ضابط هناك مسك مواطن أمريكي أسود يكدره في الشارع على حاجة فارغة حتى لو مش خايناني الذاكرة..فما كان من الضابط ده إلا وحط دماغ التاني على الرصيف وفضل ضاغط بجزمته على رقبته لحد ما الراجل روحه طلعت..وقامت الدنيا هناك بقى على أثر الفاجعة دي وانطلقت الصيحات الغاضبة في العالم كله تباعًا..ساعتها صديقة ليا..أكثر حكمة بقول ده دلوقت..علقت على أحد منشوراتي إللي كنت بكتبها في الموضوع ده لإني كنت متبنية شعار الحملة..Black Lives Matter..بس هى ردت وقالت بإن All Lives Matter..وكان جدل بينا بقى وقتها..بس دلوقت بقول إن هى كانت صح والبعد إللي كانت بتتكلم فيه ما أدركتوش أنا غير بعدين..بالمناسبة هى عاشت في أمريكا حبة حلوين فيمكن ده خلق عندها perspective متقدم شوية عننا في القضايا إللي من النوع ده..الفكرة إن أه..طب ما هى الروح واحدة فعلًا..والكرامة الإنسانية يصح تكون مصانة للجميع..يعني هو لو مواطن لاتينو ولا أبيض إللي كان مكان George Floyd..المواطن الأمريكي الأسود إللي اتقتل..كانت حتفرق؟ كان ده حيتطلب تعاطف وغضب أقل؟ طبعًا احتمال إن ده يحصل مع واحد أبيض قليل جدًا بس هو يتفضل احتمال ووارد يحصل ساعتها هل محدش حيتعاطف معاه ولا يثور لحياته إللي أُهدرت؟ يعني القصاص من المجرم للضحية متوقف على لون بشرة الضحية؟ هل ده عادل؟

- اليومين دول في مصر فيه حادثة أليمة قالبة الدنيا..ميكروباص دخل فيه تريلة باين كان سواقها داخل عكسي لأ وقلبه الجامد خلاه يعمل ده على طريق سريع رابط بين المحافظات..طبعًا كل إللي في الميكروباص ماتوا..المفروض إن دي فاجعة تخلي الناس تغضب لها في حد ذاتها..لكن إللي حصل وإللي أثار اندهاشي هو إن الغضب جه من حاجة تانية خالص أنا مش عارفة أيه محل إعراب ذكرها من حيث المبتدى في متن خبر عن حادثة مرورية..إللي اتقال تفاصيل تخص حياة الضحايا بإنهن إناث..وإنهن عاملات بيومية 130 جنيه..وإن فيه منهن القاصرات بس بيشتغلوا..وإن منهم إللي بتشتغل عشان تجهز لجوازها أو تكمل تعليمها وإللي وإللي..طبعًأ هنا دي بقت قضية رأي عام..لكن هل ده منطقي؟ هل ده أصلًا عادل إن التعاطف ده كله بس يحصل عشان الضحايا طلعوا فقرا؟ يعني لو كانوا من طبقة متوسطة مثلًا..ولا لو كانوا في الميكروباص في طريقهم لفسحة مش عودة من وردية شغل شاقة..أو لو كان الضحية CEO راكب عربية بسواق ورايح شغله برضه وكان لا ليه ولا عليه وفجأة لقى سواق تريلة داخل فيه عكسي ومات فده يستحق اهتمام أو تعاطف أقل؟ ده ساعتها كان الـnarrative حيتغير تمامًا وحنلاقي الناس متعاطفة مع سواق التريلة ده عشان هو شخصيًا راجل غلبان خارج من صباحية ربنا يجري على أكل عيشه وكان سايق دايخ من التعب وقلة النوم عشان مطبق وردية..يعني حتى المذنب كان حيتبصله مرة على إنه مجرم ومرة على إنه هو شخصيًا ضحية على حسب الطبقة الاجتماعية للمتوفي..طيب هل ده عادل؟ ده وأنا بتناقش على الـsocial media جالي الرد ده (مع الاعتذار عن الركاكة اللغوية لصاحب التعليق): " اه هتبقى اقل فاجعه لان موت طفله في غزه بصاروخ و هي متعشتش غير موت طفله غريئه في الساحل الشرير"..وبمعزل عن إنه استخدم قياس مش موحد لإني بتكلم عن ناس بتموت بنفس الطريقة فلازم يلاقوا نفس المعاملة..بس ما أظنيش إنه كان حيتفق مع ده برضه وكان حيصر على إنهما لا يستويان..إذن الروح ما بقتش واحدة والكرامة الإنسانية ما بقتش مكفولة للجميع..هل ده عادل؟

- كل فترة والتانية كده بتحصل موجة layoffs كبيرة سواء محلية أو في شركة multinational كبيرة برة تلم تعاطف الناس حواليها..أخرها إللي حصل في شركة MaxAB عندنا في مصر..في المواقف دي بنلاقي موقع زي الـLinkedIn مثلًا بيقوم ما بيقعدش وكل الناس بتعرض إنها تساعد إللي حصلهم الـlayoff..وبمعزل بقى ده بيبقى عرض حقيقي ولا محاولة بائسة لصنع good publicity للشركات إللي شغالين فيها إللي بيعرضوا مساعدتهم..بس يظله السؤال قائم هنا برضه..إشمعنى؟ إللي حصلهم layoff دي ناس خارجة من شركة اسمها معروف فحتلاقيهم بيصطادوهم أصلًا في أسرع وقت من قبل شركات تانية..خارجين بـseverance package تسترهم لفترة..فيبقى ليه دول ياخدوا تعاطف ودعم أكتر من واحد بقاله شهور وشهور نازل فحت وردم في سوق العمل عشان يلاقي فرصة ومش لاقي مع إنه ممكن يكون أعلى كفاءة..هل ده عادل؟

- كان الدحيح عامل حلقة زمان..مش فاكرة عنوانها للأسف..بس بيتهيألي أيام ما كان شغال مع منصة AJ (أيام ما كان بيعمل محتوى حلو)..كان بيقول إننا لو عايزين نعمل حملة تبرعات مثلًا يبقى أحسن أسلوب يُتبع هنا إننا نجيب حالة بعينها نركز عليها عشان الناس هنا تعاطفها حيبقى أضعاف مضاعفة لما تجيبلهم حالة يرتبطوا بها عاطفيًا عن لما تجيلهم تقولهم عندنا..وليكن..100000 طفل في مصر محتاجين عملية قلب مفتوح..فبإتباع الـapproach الأولاني فإنت بكده حتضمن نجاح الحملة وجمع قدر أكبر من التبرعات..ومع تسليمنا بإن دي طبيعة النفس البشرية فعلًا وإلية عملها..بس هل ده سبب كافي عشان أتبع الأسلوب ده فعلًا؟ أصل هل ده عادل؟ أيه الشعور إللي ممكن يترسب في وجدان طفل محتاج عملية قلب مفتوح لما يشوف طفل تاني هو إللي متسلط عليه الضوء في الإعلانات ونائل كل الاهتمام ده من كل الناس وهو مفيش أي اهتمام به يُذكر اللهم من أهله..هل ده عادل؟

ففكرة إن يتاخد عينة ممثلة لظاهرة معينة ويتم التركيز عليها كل التركيز من قبل المجتمع دونًا عن غيرها..فيما يُعرف بـ"قضية الرأي العام" دي فكرة ظالمة وقاهرة كمان..لإن ببساطة الضحايا الأخرين إللي بيلاقوا نفس النوع من الظلم والفواجع ما يقدروش يعترضوا وقتها على إن غيرهم واخد الاهتمام ده كله لوحده وإلا يبقى بيطعنوا في ضحية زيهم فكله بيأسر السلامة هنا ومش بيعمل ده طبعًا وبيعيش مع ألمه مع نفسه دون البوح به.

ده غير إننا لو بنتكلم عن جريمة فإللي بيحصل إن الرأي العام بنلاقيه إما بيطالب بتوقيع عقوبة على المذنب من نوعية العقوبات إللي كانت بتوقع على الناس في القرون الوسطى كده أو حنلاقي إن الـnarrative بيتغير تغير غير منطقي والمذنب ممكن يتحول لضحية هو نفسه زي النموذج إللي ضربته فوق..والقضاة دول بشر أولًا وأخيرًا بيتأثروا بكل إللي بيتقال ويحصل حواليهم..فهل حكم القاضي في قضية رأي عام وهو تحت وطأة الضعوطات دي كلها حيبقى حكم عادل؟ هل ده من مصلحة المتهم إللي هو إنسان برضه وخضوعه لمحاكمة عادلة يعتبر من أقل حقوقه؟

بس هل الحل هو الحد من تكون رأي عام؟ هل ده صحي؟ طيب ما هو لو عملنا كده الناس حتتعلم إزاي؟ ما هو البشر بيصعدوا سلم التعلم من خلال التجربة والخطأ..النهاردة أنا كونت رأي غلط بكرة حتعلم من ده وحيبقى حكمي أكثر رشدًا..ودي أصلها طريقة التعلم المتبعة على صعيد الأفراد والشعوب حتى على بعضها والوحيدة بالمناسبة فلا يمكن تجنبها..ولكن..وماذا عن ضحايا تكون الرأي العام إللي حيروحوا على سلم التعلم ده؟

على الناحية التانية ما الرأي العام له فوائد برضه..حركة Black Lives Matter أكيد ساهمت في توفير حماية أكبر لأقلية معروف إنها لسة مضطهدة في أمريكا..حادثة عاملات المنوفية دي أحيت الكلام عن الحد الأدنى للأجور في مصر وكفاءة المنظومة إللي بتحكم العمل عمومًا في مصر ويمكن ده يودينا في حتة أحسن في الموضوع ده..التركيز في سرعة توظيف مجموعة كبيرة اتعملها layoff مرة واحدة على بعضها كده أكيد مهم للسلم الاجتماعي لإن الـnuance إللي تقدر تعمله المجموعة دي ممكن يكون له أثار سلبية أضعاف مضاعفة على المجتمع لو محدش إهتم بإللي حصلهم..جمع التبرعات من خلال التركيز على طفل واحد أه حيأذي مشاعر أطفال تانية بس ما هو ده إللي حيجيب الفلوس إللي حتنقذهم من مرضهم عمومًا.

أظلني أميل لتحقيق العدالة عمومًا بمعزل عن أي حيثيات تانية عن نفسي..فأه..بشوف إن ظاهرة قضايا الرأي العام دي لازم نحاصرها إينما كان لذلك لنا سبيلًا.