أزمة العرب مع رغي المصريين
كتير من العرب يأخذ علينا المصريين كوننا كلامنا كتير..بس الحقيقة دي ميزة ميزنا بها رب الكون مش عيب أبدًا. 😁
المصري القديم مثلًا دون كل شيء..كل معتقداتنا وقوانيننا ومظاهر حياتنا وتاريخ ملوك وملكات الأسر التلاتين..ولهذا عبرت الحضارة المصرية القديمة إلى العالم..على عكس الفينيقيين إللي يا سبحان الله أول من أخترع الحروف الأبجدية..ولكنهم لم يدونوا شيئًا فلم نعرف عن حضارتهم..شرط أساسي لأي حضارة عشان تعبر للأجيال اللاحقة أن يدونها أهل زمانها.
فكرة إننا شعب بيدون كل حاجة دي أخدت منحى تاني في بدايات القرن العشرين..فتميزنا في الأدب والصحافة وطبعًا السينما إللي وثقنا من خلالها مظاهر حياتنا اليومية وعادتنا وموسيقانا.
كمان كوننا بندون..بل ونجحنا في استخدام وسائط كالفن والأدب والصحافة لنقل ما ندونه لباقي الأقطار العربية فده خلى باقي العرب يألفوا اللكنة المصرية وقبل منها الشخصية المصرية المعاصرة وطبائعها..ولإننا على صعيد أخر أكبر شعب عربي من حيث الكثافة السكانية..فده سهل انتقال العمالة المصرية للدول العربية..بس كان تميزنا في قطاعات التعليم بالذات..قدرتنا على الاسترسال خلقت عندنا قدرة تانية لإيصال المعلومة بشكل وافي وسلس.
مع دخول عصر الإعلام البديل..كنا أول من تميز برضه على الرغم من تدني مستوى التعليم..بس فضل شغفنا بنقل ومشاركة ما نعرف..فبقى أكتر صناع محتوى متابعة في الوطن العربي هم المصريين..هل لإننا الأكثر معرفة؟ لأ..بس لإننا أكتر ناس عايزة تشارك معرفتها مع الأخر..الشيء المفتقد مع باقي الدول العربية وعشان كده تلاقي الناس بتتابعنا إحنا المصريين بس المصريين مش بيتابعوا حد..ببساطة مفيش ناس تانية حابة ترغي زينا كده وتنقل معرفتها للأخر وتعلم غيرها..يمكن ده ابتدا يتغير مؤخرًا وبقى فيه صناع محتوى معروفين من دول عربية أخرى ودي علامة صحية نتمنى إنها تستمر وتزدهر..لكنا نظلنا نحن في الصدارة في هذا الشأن حتى الأن.
فبيت القصيد إن طبيعتنا
المسترسلة دي هى إللي خلت عندنا قوة ناعمة ذات تاثير على محيطنا العربي وبالتالي
السبب وراء ثقلنا الثقافي في المنطقة.
x
Comments
Post a Comment